स्थानीय एफएम रेडियोले प्रशारण गरेको तालिम सम्बन्धी सूचनाले १२ कक्षा पढेकी कलैया उप–महानगर पालिका–४, अदालत टोल निवासी अनामिका गुप्ता (वर्ष १९) को जीवनले फरक मोड लियो । खास के थियो त्यो सूचनामा जस्ले बेरोजगार अनामिकालाई उद्यमी नै बन्ने बाटो देखायो ?

कुरा बैशाख महिनाको हो । गाउँमै सहायक ब्युटिसियनको निःशुल्क तालिम खुलेको थियो । यो अवसर जुटाएको थियो ग्रामीण उद्यम तथा विप्रेषण (समृद्धि) आयोजनाको आर्थिक सहयोग र हेल्भेटास नेपालको प्राविधिक सहयोगमा स्थानीय एक तालिम तथा रोजगार सेवा प्रदायक संस्था उद्यम विकास परामर्श तथा तालिम केन्द्र प्रा.लि. कलैयाले ।

उनले गत १२ बैशाख देखि १४ साउन २०७६ सम्म कलैयामा सञ्चालन भएको ३९० घण्टा अवधिको सहायक ब्युटिसियन तालिम सफलतापूर्वक पुरा गरिन् र सीप परीक्षणमा समेत सहभागी भइन् । यस बीचमा उनीमा आफ्नै व्यवसाय गर्ने सोच बनिसकेको थियो तर त्यसका लागि लगानी कसरी जुटाउने भन्ने चिन्ता पनि सँगसँगै थियो । गत भदौ महिनामा सरसापट आदि गरेर जुटाइन् नौहजर रुपैयाँ र त्यसबाटै शुरु गरिन् कलैयामै अमृता ब्युटिपार्लर नामक व्यवसाय । यो सेवामूलक व्यवसाय भएकाले खासमा सीप र श्रम बिक्री गर्ने हो । यो उनको शुरुवाती अवस्था हो । अहिलेको कमाइबाट उनी सन्तुष्ट छिन् । यही कमाइले उनले आफ्नो खर्च धानेको छ र घरखर्चमा पनि भरथेग गर्न सकेकी छन् । एनआइसी एसिया बैकमा खाता खोली सानोतिनो बचत पनि शुरु गरेकी छिन् उनले । “तर यत्तिले मात्र कहाँ हुन्छ र बढाउँदैछु व्यवसाय” उनी खुलेर बताउछिन् । यति मात्र हैन उनलाई उच्चशिक्षा अध्ययन गर्ने भोक पनि जागेको छ । यसका लागि पार्लरबाट आएको आम्दानीले साथ दिनेमा उनी विस्वस्त छिन् ।

प्रस्तोताः सुशिल कुमार यादव